Më 7 qershor, Misioni i Bashkimit Evropian për Sundim të Ligjit në Kosovë (EULEX) organizoi një ndejë lamtumire për Shefin e tij të Misionit, Lars-Gunnar Wigemark, i cili pritet të përmbyllë mandatin e tij gjatë qershorit 2023. Presidentja e Kosovës Vjosa Osmani-Sadriu, Kryetari i Parlamentit Glauk Konjufca, Kryeministri Albin Kurti, Ministri i Punëve të Brendshme Xhelal Sveçla, krerë të organizatave ndërkombëtare, Ambasadorë, përfaqësues të partive politike, organizatave të shoqërisë civile, dhe mediave, si dhe stafi i EULEX-it u mblodhën në këtë pritje zyrtare për t’i thënë lamtumirë Shefit të Misionit EULEX.

Wigemark falënderoi partnerët vendas të Misionit dhe stafin e EULEX-it për bashkëpunimin e tyre dhe shtoi se lamtumira asnjëherë nuk është e lehtë. “Kur erdha për herë të parë në Prishtinë si diplomat suedez i ri në moshë para më shumë se 30 viteve, këtu mbretëronte një frymë e represionit dhe depresionit që më vonë do të shpërthente në një konflikt të dhunshëm. Kur u ktheva pas shumë vitesh dhe në rrethana tjera si një përfaqësues i Bashkimin Evropian, organizatë në të cilën shteti im as nuk ishte i anëtarësuar kur erdha për herë të parë në fillim të viteve 90-ta, gjeta një atmosferë krejt ndryshe e mbushur me energji dhe shpresë. Dhe një popullsi të re në moshë në kërkim të një të ardhmeje më të mirë,” tha Wigemark, duke shtuar: “Kanalizimi i aspiratave të qytetarëve të rëndomtë të Kosovës, cilitdo komunitet dhe përkatësi etnike që i takojnë, ka qenë një prej ambicieve të mia kryesore si Shef i EULEX- it. Kjo është një rrugë që përfundimisht do të shpije në integrim të plotë në Bashkimin Evropian dhe Ballkan Perëndimor paqësor.”



Gjatë pritjes zyrtare, Presidentja e Kosovës Vjosa Osmani-Sadriu, dha një fjalim të përzemërt, ku rrjedhshëm ilustroi atë që partneriteti solid mes Kosovës dhe EULEX-it mund të bëjë: “Ky është një prej atyre rasteve kur ne festojmë partneritetin tonë, por njëkohësisht shprehim keqardhjen tonë që një njeri që ka kontribuar kaq shumë për këtë partneritet do të vazhdojë të na vëzhgojë nga pak më larg. Kjo po ashtu është një mundësi e shkëlqyer për të shprehur mirënjohjen tonë, falënderimet tona për të gjitha që ju [z. Wigemark] keni bërë gjatë këtyre viteve, dhe [falënderimet tona] për përfaqësimin e diplomatit që e njeh kontekstin, diplomatin që ka qenë këtu kur shumica prej nesh ishim fëmijët e kohës së para tridhjetë viteve në mesin e të shtypurve, por edhe diplomatin që sot e kupton dhe vazhdon ta konsiderojë Kosovën partner të vërtetë për sundim të ligjit, demokraci dhe drejtësi. Dhe ashtu siç e thotë edhe vet motoja e EULEX-it, gjatë këtyre pak viteve ju keni arritur të ktheni EULEX-in nga një Mision me imazh jo shumë të mirë – nëse mund të jem shumë e sinqertë – në një Mision që secili e konsideron partner të vërtetë për drejtësi. Sepse partneritetet janë – unë besoj – fuqitë tona më të mëdha.”



Mbrëmja vazhdoi me fjalimin e Kryeministrit të Kosovës Albin Kurti, i cili kujtoi bisedat dhe diskutimet me Shefin e EULEX-it për tema të ndryshme. “Në vitin 2008, kur EULEX-i me pushtetin e tij të gjerë ekzekutiv zbarkoi në Kosovë, nuk isha aq i lumtur. Sonte, 15 vjet më vonë, kur duhet t’i themi lamtumirën Larsit, përsëri nuk jam aq i lumtur,” tha Kryeministri Kurti, i cili ngreu dolli për Shefin e EULEX-it për të gjitha që ka bërë për Kosovën dhe njerëzit e saj.



Lars-Gunnar Wigemark filloi detyrën si Shef i EULEX-it në janar 2020. Ai do të përmbyllë detyrën e tij në qershor 2023.