Më 5 maj 2025, me qëllim të promovimit të gjithëpërfshirjes dhe sigurimit të qasjes së barabartë në informata që kanë të bëjnë me drejtësinë, Misioni i Bashkimit Evropian për Sundimin e Ligjit në Kosovë (EULEX) i dorëzoi Shoqatës së të Verbërve në Kosovë Raportin të tij më të fundit të Monitorimit të Drejtësisë të shtypur në alfabetin Brail.

Kjo nismë e thekson përkushtimin e vazhdueshëm të Misionit për të bërë drejtësinë dhe informatat publike lidhur me të më të qasshme për të gjithë pjesëtarët e shoqërisë, përfshirë komunitetin e personave të verbër. Me anë të kësaj, Misioni synon që të nxisë një përfshirje më të gjerë të publikut në diskutimet për sundimin e ligjit dhe të sigurojë që secili të ketë zë në proceset demokratike të Kosovës.