Në përputhje me përkushtimin e tij për zbatimin e Agjendës për Gratë, Paqen dhe Sigurinë (GPS), gjatë muajit të kaluar dhe përmes disa aktiviteteve të ndryshme, Misioni i Bashkimit Evropian për Sundimin e Ligjit në Kosovë (EULEX) e ka mbështetur punën jashtëzakonisht të rëndësishme të Shoqatës së Grave të Policisë së Kosovës në fuqizimin e grave brenda Policisë së Kosovës dhe Shërbimit Korrektues të Kosovës, duke e rritur përfaqësimin e tyre në role udhëheqëse dhe, në fund, duke e promovuar barazinë gjinore.

Diskutimet dhe punëtoritë janë përqendruar në mënyrat për t’i luftuar paragjykimet dhe stereotipet që lidhen me pjesëmarrjen e grave në institucionet e sektorit të sigurisë, rëndësinë e udhëheqjes nga gratë dhe programeve të mentorimit, si dhe tema të bazuara në përmbajtje të zhvillimit profesional. Në veçanti:

Më 11 prill, në Prishtinë, Misioni e mbështeti një bashkëbisedim me 20 police të fokusuar në rëndësinë e programeve për zhvillim profesional dhe avancimin në nivelet vendimmarrëse brenda Policisë, me qëllim të sigurimit të përfaqësimit të barabartë në nivelet udhëheqëse dhe përfshirjes efektive në formësimin e politikave të sigurisë.

Më 30 prill, në Mitrovicë, Misioni e mbështeti një trajnim mbi rolin e grave në shoqëri dhe ndikimin e ndryshimeve sociale për 25 police nga i gjithë rajoni i Mitrovicës. Qëllimi i trajnimit ishte të theksohej rëndësia e rolit të grave në institucionet e sektorit të sigurisë për t’u përshtatur në mënyrë efektive me ndryshimet në shoqëri dhe për të siguruar mirëkuptimin e nevojave të komuniteteve. Gjatë diskutimit u prekën edhe mënyrat për luftimin e paragjykimit dhe stereotipeve që lidhen me pjesëmarrjen e grave në sektorin e sigurisë.

Përfundimisht, më 5 dhe 6 maj, u mbajtën dy trajnime shtesë të bazuara në përmbajtje mbi mizogjininë online dhe krimet kibernetike për rreth 50 zyrtare nga Shoqata e Grave në Policinë e Kosovës dhe Shoqata e Grave në Shërbimin Korrektues të Kosovës, me qëllim të forcimit të aftësive të tyre për reagim.

EULEX-i do të vazhdojë të avokojë dhe të punojë për rritjen e pranisë së grave në institucionet e sektorit të sigurisë, në mënyrë që të arrihet një përfaqësim i plotë i komuniteteve të ndryshme të cilave u shërbejnë ato, duke i përmirësuar mekanizmat e mbrojtjes dhe duke siguruar që gratë të kenë një rol aktiv në formësimin e punës dhe politikave të sektorit të sigurisë.