Dje, në Prishtinë, EULEX-i e mbajti një punëtori për përmirësimin e teknikave të hetimit lidhur me rastet e korrupsionit. Alan Edwards, Shef i Njësisë së EULEX-it për Hetimin e Krimit të Organizuar (NJHKO) dhe zyrtarët e EULEX-it për hetimin e krimeve të rënda, Borislav Getsev, Marco Passarelli dhe Giancarlo Monteverdi e udhëhoqën një trajnim i cili ishte i përqendruar në rritjen e kapacitetit të hetuesve të Agjencisë Kosovare Kundër Korrupsionit (AKK) për ta luftuar korrupsionin. 

Punëtoria për personelin e AKK-së u mbajt si pjesë e një projekti më të madh të nisur nga Njësiti i Antikorrupsionit i EULEX-it dhe i implementuar nga NJHKO. Projekti, i cili do të zgjasë disa muaj, do t’i pajisë pjesëmarrësit me shkathtësitë e nevojshme për mbledhjen e provave për procesin e ndjekjes penale. 

Punëtoria ndërvepruese ua mundësoi hetuesve që t’i këmbejnë praktikat më të mira, t’i ndajnë përvojat dhe të përqendrohen në teknikat hetuese siç janë shkathtësitë e intervistimit dhe të shkruarit të raporteve. 

Kjo është punëtoria e dytë me radhë në kuadër të bashkëpunimit ndërmjet EULEX-it dhe Agjencisë në përpjekjen për t’i zhvilluar kapacitetet vendase dhe për të krijuar partneritet të qëndrueshëm për ndalimin e korrupsionit.

Hetuesit nga Agjencia e Antikorrupsionit kane mirëpritur këtë model të trajnimit pasi që patën mundësi të mësojnë teknikat e NJHKO të EULEX-it dhe modelet e mëhershme. Një vlerë tjetër e punëtorisë ishte bashkëpunimi në mes të kolegëve të EULEX-it me ata të AKK-së.

“Gjatë gjashtë muajve të ardhshëm, ne do t’i ftojmë zyrtarët e AKK-së që të na bashkohen gjatë intervistave të drejtpërdrejta. Kur të përfundojë kjo, ne do ta bëjmë përmbledhjen e asaj që kanë mësuar ata dhe të gjërave të cilat i kemi arritur së bashku. Si rezultat, ne do të jemi në gjendje ta bëjmë vlerësimin e mënyrës së përmirësimit të shkathtësive të tyre, në veçanti të shkruarit e raporteve dhe të udhëhequrit e ndjekjeve penale, “ sqaron Alan Edwards.

Objektivi përfundimtar i projektit është ndërtimi i kapacitetit të AKK-së për t’i hetuar krimet e korrupsionit kur të shkojë Njësia e EULEX-it për Hetimin e Krimit të Organizuar. Sipas Edwards, qëllimi është që pas të lihet një ekip i fortë i hetuesve që do të jetë në gjendje të merret me çështjet komplekse në këtë fushë.