Në kërkim të të pagjeturve

20 February, 2012

Çështja e të pagjeturve vazhdon të jetë një temë shumë e ndjeshme, emocionuese dhe e rëndësishme. Deri tani, trembëdhjetë vite pas luftës, kanë mbetur shumë raste të pazgjidhura. Ne ende nuk e dimë vendndodhjen e rreth 1790 personave nga radhët e të gjitha komuniteteve në Kosovë. Prandaj, prioriteti i Ministrisë së Drejtësisë dhe EULEX-it, përmes Departamentit për Mjekësi Ligjore, është që të vazhdojnë përpjekjet e tyre për t’i gjetur dhe kthyer mbetjet mortore të dashurve tek familjet e tyre, dhe kështu të ndihmojnë në procesin e pajtimit.

“Jam i lumtur që po e prezantoj këtë dokumentar tridhjetë minutash me rastin e publikimit të raportit njëvjeçar të Departamentit për Mjekësi Ligjore. Ky dokumentar e paraqet punën e këtij departamenti dhe i dokumenton vështirësitë me të cilat përballet personeli i tij në punën e tyre të përditshme, si dhe të arriturat e tyre të shumta. Këtu paraqiten njerëzit të cilët sjellin shpirtin dhe përvojën e tyre jetësore në punën e tyre për të kontribuar për çështjen e personave të pagjetur në Kosovë. Njëra nga temat më të rëndësishme në këtë dokumentar është se si personeli i EULEX-it ia përcjell njohuritë dhe aftësitë e tyre bashkëpunëtorëve të tyre vendas, në mënyrë që të ngritën kapacitetet vendase për një kohë afatgjate. Ky film, gjithashtu, mëton t’i kundërpërgjigjet kritikave se numri i personave të pagjetur nuk është zvogëluar dhe se asgjë nuk është duke u bërë në këtë drejtim”, thotë Francoise Lambert, Zëvendës Drejtoreshë e Zyrës për Shtyp dhe Informim Publik të EULEX-it. “

Që nga themelimi i tij në vitin 2008, DML-ja në mënyrë efektive dhe konkrete ka kontribuar në vënien e bazamentit për ta ngritur një qendër profesionale për kërkime mjeko-ligjore dhe ka ndihmuar në zgjidhjen e rasteve të personave të pagjetur. Ky dokumentar përqendrohet në profesione të ndryshme që përfshihen në procesin e rasteve të personave të pagjetur si: arkeologë dhe antropolog ë mjeko-ligjor, asistentët për shoqërinë civile dhe për sensibilizim, koordinatorët për zhvarrosje – ndërsa lista është e gjatë. Ai, po ashtu, e vë në pah edhe punën e ekspertëve të EULEX-it në monitorimin, mentorimin dhe këshillimin, me qëllim të trajnimit të ekspertëve vendas në mënyrë që ata vetë të jenë të aftë ta kryejnë këtë detyrë. Së bashku me EULEX-in, Ministria e Drejtësisë e ka themeluar një ekip kosovar për zhvarrosje në kuadër të DML-së, i cili është trajnuar në arkeologji mjeko-ligjore. Kjo është shumë me rëndësi pasi që, në një të ardhme të afërt, ky ekip do të jetë përgjegjës për shumë punë në këtë fushë.